ನಾನು
ಯಾವ ಧರ್ಮಕ್ಕೂ ಸೇರಿದವನಲ್ಲಾ;
ಎಲ್ಲಾ ಧರ್ಮಕ್ಕೂ ಸೇರಿದವನು

ನಾನು
ಯಾವ ಧರ್ಮದ ಪರವೂ ಇಲ್ಲಾ
ಎಲ್ಲಾ ಧರ್ಮದ ಜೀವದ ಪರ

ನಾನು
ಒಂದು ಧರ್ಮವೇ;
ಒಂದು ಗ್ರಂಥವೇ;
ಒಂದು ಭಾಷೆಯೇ;
ಒಬ್ಬ ದೊರೆಯೇ;
ಶ್ರೇಷ್ಠವೆಂಬ ಸಟೆಯನ್ನು
ಒಪ್ಪುವುದಿಲ್ಲಾ

ನಾನು
ಬ್ರಾಹ್ಮಣ್ಯವೇ ಯುಕ್ತಿ;
ಕ್ಷತ್ರಿಯವೇ ಶಕ್ತಿ;
ವೈಶ್ಯವೇ ವ್ಯವಹಾರ;
ಶೂದ್ರವೇ ಸೇವೆ;
-ವೆಂಬ ನನ್ನೊಳಗಿನ ‘ವರ್ಣ’ರಂಜಿತ
‘ಮನು’ವನ್ನು ಕೊಂದಿದ್ದೇನೆ

ನಾನು
ರಾಮನನ್ನು ನಂಬುವುದಿಲ್ಲಾ;
ಅಲ್ಲಾಹುನನ್ನು ನಂಬುವುದಿಲ್ಲಾ;
ಏಸುನನ್ನು ನಂಬುವುದಿಲ್ಲಾ;
ನಂಬಿರುವುದು ಶರಣನಾದ
ಜಲಗಾರನನ್ನೇ; ಎಲ್ಲರೂ ಅವನೇ

ನಾನು
ಈ ದೇಶದಲ್ಲಿಲ್ಲಾ:
ಆ ದೇಶದಲ್ಲಿಲ್ಲಾ;
ಇರುವ ನೆಲವೆ ಒಂದು ರಾಷ್ಟ್ರ,
ನುಡಿವ ನುಡಿಯೇ ರಾಷ್ಟ್ರಭಾಷೆ,
ಹಾಡುವ ಹಾಡೇ ರಾಷ್ಟ್ರಗೀತೆ,
ಉಡುವ ಅಂಗಿಯೇ ರಾಷ್ಟ್ರಬಾವುಟ

ನಾನು
ಗುಡಿ, ಚರ್ಚು, ಮಸೀದಿಗಳಲಿಲ್ಲಾ;
ಪಾರ್ಲಿಮೆಂಟಿನಲ್ಲಿಲ್ಲಾ;
ಜ್ಞಾನಿಯಲ್ಲಾ, ಜವಾನನಲ್ಲಾ,
ರೈತನಲ್ಲಾ, ಸೈನಿಕನಲ್ಲಾ;
ಎಲ್ಲರೊಳಗಿರುವ ಬುದ್ಧ

ಇಂದು
ನಾನು
ಬದುಕಿಲ್ಲಾ;
ಬದುಕಿದ್ದರೆ, ಪ್ರೀತಿಯಲ್ಲಿ ಮಾತ್ರ
ಸತ್ತರೆ, ಭೂಮಿಯೇ ರಣರಂಗ

ಇಂತಿ ನಿಮ್ಮ ನಾನು