Tag: telescope

ಅನ್ಯಗ್ರಹದಲ್ಲಿ ನಡೆದ ಮೊದಲ ವೈಮಾನಿಕ ಹಾರಾಟ

~ neelamouna ~ Leave a comment

ಡಿಸೆಂಬರ್ 17, 1903ರಲ್ಲಿ ಅರ್ವಿಲ್ಲೇ ರೈಟ್ ಮತ್ತು ವಿಲ್ಬರ್ ರೈಟ್ (ರೈಟ್ ಬ್ರದರ್ಸ್) ಇಬ್ಬರೂ ತಾವೇ ರೂಪಿಸಿದ ವಿಮಾನವನ್ನು ಕ್ಯಾಲಿಫೋರ್ನಿಯಾದ ಕಿಟ್ಟಿ ಹಾಕ್ ಪ್ರದೇಶದಲ್ಲಿ ಮೊದಲ ಬಾರಿಗೆ ಹಾರಿಸಿದರು. ಈ ವಿಮಾನವು 12 ಸೆಕೆಂಡುಗಳ ವರೆಗೆ, ಭೂ ಪ್ರದೇಶದಿಂದ 20 ಅಡಿಗಳ ಅಂತರದಲ್ಲಿ ಹಾರಾಟ ನಡೆಸಿತು. ಇದು ಮಾನವನ ಇತಿಹಾಸದಲ್ಲೇ ಒಂದು ಚಾರಿತ್ರಿಕ ಮೈಲುಗಲ್ಲು.  ರೈಟ್ ಬ್ರದರ್ಸ್ ನ ವಿಮಾನ ಹಾರಾಟವಾಗಿ ಒಂದು ದಶಕದ ಅಂತರದಲ್ಲಿಯೇ (1914 ರಲ್ಲಿ) ಪ್ರಪಂಚದ ಮೊದಲ ಪ್ರಯಾಣಿಕ ವಿಮಾನ ಹಾರಿತು.  ನಂತರ ವೈಮಾನಿಕ ಕ್ಷೇತ್ರದಲ್ಲಿ ನಡೆದಿರುವುದೆಲ್ಲವೂ ರೊಚಕ ಇತಿಹಾಸ, ಅದರಲ್ಲೂ 1969, ಜುಲೈ 20 ರಂದು ಚಂದ್ರನ ಮೇಲೆ ನೀಲ್ ಆರ್ಮಸ್ಟ್ರಾಂಗ್ ನುಡಿದ ಮೊದಲ ನುಡಿಯು ಇನ್ನೂ ನಮ್ಮ ಕಿವಿಯಲ್ಲಿ ಗುಂಗುತ್ತಲೇ ಇದೆ. “That’s one small step for man. One giant leap for Mankind”

Wright Borthers Airplane [Credit: Google Photos]

ರೈಟ್ ಬ್ರದರ್ಸ್ ಅಂದು ನಡೆಸಿದ ಮೊದಲ ವಿಮಾನ ಹಾರಟದಂತೆಯೇ ಇಂದು ನಡೆದ (ಏಪ್ರಿಲ್ 19, 2021) ಮತ್ತೊಂದು ಚಾರಿತ್ರಿಕ ಘಟನೆಗೆ ನಾವೆಲ್ಲರೂ ಸಾಕ್ಷಿಯಾಗಿದ್ದೇವೆ.  ಇದು ನಡೆಯುತ್ತಿರುವುದು ಭೂಮಿಯ ಮೇಲೆ ಅಲ್ಲ, ಬದಲಾಗಿ ಭೂಮಿಯಿಂದ ಸುಮಾರು 48 ಕೋಟಿ ಕಿಲೋಮೀಟರ್ ದೂರದಲ್ಲಿರುವ ಮಂಗಳ ಗ್ರಹದ ಮೇಲೆ.

ನಾಸಾ ಬಾಹ್ಯಾಕಾಶ ಸಂಸ್ಥೆಯು ಜುಲೈ 30, 2020ರಂದು ಅಟ್ಲಾಸ್ V 541 ರಾಕೆಟ್ ನಲ್ಲಿ ಪರ್ಸಿವರೆನ್ಸ್ ಎಂಬ ರೋವರ್ ಅನ್ನು ಮಂಗಳ ಗ್ರಹಕ್ಕೆ ಕಳುಹಿಸಿತು. ಈ ರೋವರ್ ಸುಮಾರು ಏಳು ತಿಂಗಳಲ್ಲಿ, 48 ಕೋಟಿ ಕಿಲೋಮೀಟರ್ ಸಂಚರಿಸಿ ಫೆಬ್ರವರಿ 18, 2021 ರಂದು ಸುರಕ್ಷಿತವಾಗಿ ಮಂಗಳನ ಮೇಲೆ ಇಳಿಯಿತು. ಈ ರೋವರ್ ಸುಮಾರು ಒಂದು ಮಂಗಳ-ವರ್ಷಗಳ ಕಾಲ (ಅಂದರೆ 687 ಭೂ ದಿನಗಳು) ಮಂಗಳನ ಮೇಲೆ ತನ್ನಲ್ಲಿರುವ ಏಳು ವೈಜ್ಞಾನಿಕ ಉಪಕರಣಗಳ ಸಹಾಯದಿಂದ ಗ್ರಹದ ಅನ್ವೇಷಣೆ ನಡೆಸುತ್ತದೆ. 

Mars 2020: ಪರ್ಸಿವರೆನ್ಸ್ ರೊವರ್ ನ ಉದ್ದೇಶವೇನು?

Perseverence Rover [Credit: NASA/JPL]

ಮಂಗಳ ಗ್ರಹದ ಮೇಲೆ ಇಳಿದಿರುವ ರೋವರ್ ಗಳಲ್ಲಿ ಪರ್ಸಿವರೆನ್ಸ್ ರೋವರ್ ಮೊದಲನೇಯ ರೋವರ್ ಅಲ್ಲಾ. ಈಗಾಗಲೇ ಹಲವು ರೋವರ್ ಗಳು ಮಂಗಳ ಗ್ರಹದಲ್ಲಿ ಅನ್ವೇಷಣೆ ಕೈಗೊಂಡಿವೆ.  ಈ ಎಲ್ಲಾ ರೋವರ್ ಗಳಿಂದ ಬಂದ ಮಾಹಿತಿಯ ಪ್ರಕಾರ ಮಂಗಳ ಗ್ರಹದಲ್ಲಿ ಜೀವಿಗಳು ಹಿಂದೆಂದೋ ಇದ್ದಿರಬಹುದಾದ ಸಾಧ್ಯತೆ ಹೆಚ್ಚಿದೆ ಎಂದು. ಆದರೆ ಯಾವ ರೋವರ್ ಗಳು ಮತ್ತು ಮಂಗಳನ ಕಕ್ಷೆಯಲ್ಲಿ ತಿರುಗುತ್ತಿರುವ ಉಪಗ್ರಹಗಳೂ ಅಲ್ಲಿ ಜೀವಿಗಳಿತ್ತು ಎಂದು ಕಂಡುಹಿಡಿದು ಸಾಬೀತುಪಡಿಸಿಲ್ಲಾ.  ಈಗ ಇಳಿದಿರುವ ಪರ್ಸಿವರೆನ್ಸ್ ರೋವರ್ ಮಂಗಳ ಗ್ರಹದಲ್ಲಿ ಹಿಂದೆದೋ ಇದ್ದ ಜೀವಿಗಳು, ಹೇಗಿದ್ದರಬಹುದು ಎಂಬ ಅಂಶವನ್ನು ಅನ್ವೇಷಣೆ ಮಾಡಲು ಹೊರಟಿದೆ. 

ಜೀವಿಗಳೆಂದರೆ, ಮನುಷ್ಯನ ಗಾತ್ರಕ್ಕೆ ಅಥವಾ ಇನ್ಯಾವುದೋ ಪ್ರಾಣಿಯ ಗಾತ್ರಕ್ಕೆ ಹೊಲುವ ಜೀವಿಗಳಲ್ಲಾ.  ಪರ್ಸಿವರೆನ್ಸ್ ಹುಡುಕಲು ಹೊರಟಿರುವುದು ಸೂಕ್ಷ್ಮಜೀವಿಗಳನ್ನು (Micriobial Life).  ಈ ಜೀವಿಗಳನ್ನು ಹುಡುಕಲು ಮಂಗಳನಲ್ಲಿ ಝೆಜಿರೋ ಕುಳಿಯನ್ನು (Jezero Crator) ಆಯ್ಕೆ ಮಾಡಿಕೊಳ್ಳಲಾಗಿದೆ.  ಯಾಕೆ ಈ ಝೇಜಿರೋ ಕುಳಿಯನ್ನೇ ಆಯ್ಕೆ ಮಾಡಿಕೊಳ್ಳಲಾಗಿದೆ ಎಂದರೆ, ಈ ಹಿಂದಿನ ಮಂಗಳನ ಭೂ ಪ್ರದೇಶಗಳ ಅನ್ವೇಷಣೆಯ ಪ್ರಕಾರ ಝೆಜಿರೋ ಕುಳಿಯಲ್ಲಿ ನೀರು ತುಂಬಿಕೊಳ್ಳುತ್ತಿದ್ದ ಸಾಧ್ಯತೆ ಹೆಚ್ಚಿದ್ದು, ಈ ನೀರಿನಲ್ಲಿ ಸೂಕ್ಷ್ಮಜೀವಿಗಳು ಜೀವಿಸಿರಬಹುದು ಎಂದು ವಿಜ್ಞಾನಿಗಳು ಗ್ರಹಿಸಿದ್ದಾರೆ.

ಪರ್ಸಿವರೆನ್ಸ್ ತನ್ನ ಉಪಕರಣಗಳಲ್ಲಿ ಒಂದಾದ ಡ್ರಿಲ್ಲಿಂಗ್ ಮೆಷಿನ್ ಸಹಾಯದಿಂದ ಟ್ಯೂಬ್ ಆಕಾರದಲ್ಲಿ ಮಣ್ಣಿನ ಮಾದರಿಯನ್ನು ತೆಗೆದು, ಒಂದು ಟ್ಯೂಬ್ ನಲ್ಲಿ ತುಂಬಿ, ಅದಕ್ಕೆ ತನ್ನಲ್ಲಿರುವ ಕೆಲವು ವೈಜ್ಞಾನಿಕ ಉಪಕರಣಗಳ ಸಹಾದಿಂದ ಪರಿಕ್ಷೆ ಮಾಡಿ ಡೇಟಾವನ್ನು ಭೂಮಿಗೆ ರವಾನಿಸುತ್ತದೆ.  ಅಲ್ಲದೆ, ಇಂತಹ ಹಲವು ಮಣ್ಣಿನ ಮಾದರಿಗಳನ್ನು ಝೆಜಿರೋ ಕುಳಿಯ ಸುತ್ತಾ ಮುತ್ತಾ ತೆಗೆದು, ಪರೀಕ್ಷಿಸಿ, ಎಲ್ಲಾ ಟ್ಯೂಬ್ ಗಳನ್ನು ಒಂದು ಕಡೆ ಗುಡ್ಡೆ ಹಾಕುತ್ತದೆ.  ಮುಂದಿನ ಹತ್ತು ವರ್ಷದಲ್ಲಿ ಮಂಗಳ ಗ್ರಹಕ್ಕೆ ತೆರಳುವ ಮತ್ತೊಂದು ರೋವರ್, ಪರ್ಸಿವರೆನ್ಸ್ ಸಂಗ್ರಹಿಸಿ ಗುಡ್ಡೆ ಮಾಡಿದ ಮಣ್ಣಿನ ಟ್ಯೂಬ್ ಗಳನ್ನು ಎತ್ತಿಕೊಂಡು ಭೂಮಿಗೆ ಮರಳುತ್ತದೆ. ನಂತರ ಭೂಮಿಯಲ್ಲಿ ಮಂಗಳನ ಮಣ್ಣಿನ ಪೂರ್ಣ ಪ್ರಮಾಣದ ಪರೀಕ್ಷೆಯನ್ನು ಮಾಡಲಾಗುತ್ತದೆ.  ಇದಕ್ಕೆ ಸುಮಾರು 10 ವರ್ಷಗಳ ಕಾಲಾವಕಾಶವನ್ನು ಅಂದಾಜಿಸಲಾಗಿದೆ.  

ಚಂದ್ರನ ನಂತರ ಅತೀ ಹೆಚ್ಚು ಬಾಹ್ಯಾಕಾಶ ಎಕ್ಸಪ್ಲೋರೇಷನ್ ಕೈಗೊಂಡ ಸೌರಮಂಡಲದ ಗ್ರಹ ಎಂದರೆ ಅದು ಮಂಗಳ ಗ್ರಹ.  ಮನುಷ್ಯನು ಚಂದ್ರನಲ್ಲಿ ಒಂದು ನಿಲ್ದಾಣ ಮಾಡಿ, ಅಲ್ಲಿಂದ ಮಂಗಳ ಗ್ರಹಕ್ಕೆ ಬಾಹ್ಯಾಕಾಶಯಾನ ಕೈಗೊಳ್ಳುವ ಕನಸು.  ಈ ಕನಸನ್ನು ನನಸು ಮಾಡುವುದಕ್ಕೆ ಪರ್ಸಿವರೆನ್ಸ್ ಹಲವು ವೈಜ್ಞಾನಿಕ ಮಾಹಿತಿಯನ್ನು ಕಲೆಹಾಕುತ್ತಿದೆ.  ಮಂಗಳ ಗ್ರಹದ ಹವಾಮಾನ, ಭೂ ಪ್ರದೇಶದ ಮಾಹಿತಿ, ಅಲ್ಲಿರುವ ವಾತವರಣದಿಂದ ಆಕ್ಸಿಜನ್ ತಯಾರಿಕೆ ಮತ್ತು ಮಾನವನ ಆಗಮನಕ್ಕೆ ಬೇಕಾದಂತೆ ಹಲವು ಮಾಹಿತಿಯನ್ನು ತನ್ನ ವೈಜ್ಞಾನಿಕ ಉಪಕರಣಗಳ ಸಹಾಯದಿಂದ ಕಲೆಹಾಕಲಿದೆ. 

ಇದರ ಜೊತೆಗೆ ಪರ್ಸಿವರೆನ್ಸ್ ರೊವರ್ ನ ಹೊಟ್ಟೆಯಲ್ಲಿ 1.8 ಕಿಲೋಗ್ರಾಂ ತೂಕದ ಸಣ್ಣ ಮಾರ್ಸ್ ಹೆಲಿಕಾಪ್ಟರ್ ಒಂದಿದೆ. ಇದನ್ನು ಇಂಜುನಿಟಿ (Ingenuity) ಎಂದು ಕರೆಯಲಾಗಿದೆ. ಈ ಹೆಲಿಕಾಪ್ಟರ್ ನಲ್ಲಿ ಕ್ಯಾಮರಾ, ಸಂವೇದಕಗಳು (sensors) ಮತ್ತು ಬ್ಯಾಟರಿಯನ್ನು ಹೊರತು ಪಡಿಸಿ ಯಾವ ವೈಜ್ಞಾನಿಕ ಉಪಕರಣವೂ ಇಲ್ಲಾ. ಇದು ಸಾಮಾನ್ಯವಾಗಿ ಅಂಗಡಿಯಲ್ಲಿ ಸಿಗುವ ರಿಮೋಟ್ ಕಂಟ್ರೋಲ್ ಹೆಲಿಕಾಪ್ಟರ್ ಮಾದರಿಯಲ್ಲೇ ಇದೆ.  ಆದರೆ ಇದು ಹಾರುವುದು ಮಾತ್ರ ಮಂಗಳ ಗ್ರಹದಲ್ಲಿ! ಇದೆ ಪ್ರಥಮ ಬಾರಿಗೆ ಅನ್ಯಗ್ರಹದಲ್ಲಿ ವೈಮಾನಿಕ ಸಂಚಾರ ನಡೆಸಲು ಅನುವಾಗುವಂತೆ ಪ್ರಾಯೋಗಿಕವಾಗಿ ಈ ಪುಟ್ಟ ಹೆಲಿಕಾಪ್ಟರ್ ಅನ್ನು ನಾಸಾ ಮಂಗಳ ಗ್ರಹದಲ್ಲಿ ಹಾರಿಸಲಿದ್ದು,  ಈ ಪ್ರಯೋಗ ಒಂದು ತಾಂತ್ರಿಕತೆಯ ಪ್ರದರ್ಶನವಾಗಿದೆ (Technology Demonstration).   

ಮಂಗಳ ಗ್ರಹದಲ್ಲಿ ಇಂತಹಾ ಸಣ್ಣ ಹೆಲಿಕಾಪ್ಟ್ ರ್ ಹಾರಿಸಲು ಕಷ್ಟಾನಾ?

ವಿಮಾನ ಅಥವಾ ಹೆಲಿಕಾಪ್ಟರ್ ಹಾರಿಸಬೇಕಾದರೆ, ಭೂಮಿಯ ವಾತವರಣದ ಸಾಂದ್ರತೆ ಎಷ್ಟಿದೆ ಎಂದು ತಿಳಿದು, ಹೆಲಿಕಾಪ್ಟರ್ ಆಗಿದ್ದರೆ ಅದರ ಬ್ಲೇಡ್ ಗಳನ್ನು ಎಷ್ಟು ವೇಗವಾಗಿ ತಿರುಗಿಸಬೇಕು, ವಿಮಾನವಾಗಿದ್ದರೆ, ಟೆಕ್ ಆಫ್ ಮಾಡಲು ಎಷ್ಟು ವೇಗವಾಗಿ ಚಲಿಸಬೇಕು ಎಂದು ಲೆಕ್ಕಾ ಹಾಕಿ ಹಾರಿಸಲಾಗುತ್ತಿದೆ. ಇದೆ ರೀತಿ ಮಂಗಳ ಗ್ರಹಕ್ಕೂ ಮಾಡಲಾಗುತ್ತದೆ. ಮಂಗಳ ಗ್ರಹದ ವಾತವರಣದ ಸಾಂದ್ರತೆ ಭೂಮಿಯ ಶೇಕಡ ಒಂದರಷ್ಟುರುವುದರಿಂದ ಹೆಲಿಕಾಪ್ಟರ್ ಅಥವಾ ವಿಮಾನವನ್ನು ಇಂತಹ ತೆಳುವಾದ ವಾತವರಣದಲ್ಲಿ ಹಾರಿಸುವುದು ಅತ್ಯಂತ ಕಷ್ಟಕರವಾದದ್ದು.

ಮಂಗಳ ಗ್ರಹದ ತೆಳುವಾದ ವಾತರವಣದಲ್ಲಿ ಹೆಲಿಕಾಪ್ಟರ್ ಹಾರಬೇಕಾದರೆ, ಅದರ ಬ್ಲೇಡ್ ಗಳು ಒಂದು ನಿಮಿಷಕ್ಕೆ ಕನಿಷ್ಟ ಅಂದರು 25,000 ಬಾರಿ ತಿರುಗಬೇಕು.  ಭೂಮಿಯಲ್ಲಿ ಈ ಸಂಖ್ಯೆ ಕೇವಲ 500 ರಿಂದ 600! ಇದು ಅತ್ಯಂತ ಸವಾಲಿನ ಕೆಲಸ, ತಾಂತ್ರಿಕವಾಗಿಯೂ ಇಂತಹಾ ಹೆಲಿಕಾಪ್ಟರ್ ಡಿಸೈನ್ ಮಾಡಿ, 48 ಕೋಟಿ ಕಿಲೋಮೀಟರ್ ದೂರದಿಂದ ಕಂಟ್ರೋಲ್ ಮಾಡುವುದು ಇನ್ನೂ ಕಷ್ಟದ ಕೆಲಸ. ಇದೇ ಕಾರಣದಿಂದ ಸತತ ಹತ್ತು ವರ್ಷಗಳ ಪ್ರಯತ್ನದಲ್ಲಿ ನಾಸಾದ ಜೆಟ್ ಪ್ರೋಪುಲ್ಶನ್ ಲ್ಯಾಬೊರೆಟರಿ (Jet Propulsion Laboratory- JPL) ವಿಜ್ಞಾನಿಗಳು, ಇಂಜಿನಿಯರ್ ಗಳು, ಡಿಸೈನರ್ ಗಳು ಎಲ್ಲರೂ ಸೇರಿ ಇಂಜುನಿಟಿ ಎಂಬ ಪುಟ್ಟ ಹೆಲಿಕಾಪ್ಟರ್ ತಯಾರಿಸಿದರು.  ಈ ಹೆಲಿಕಾಪ್ಟರ್ ಅನ್ನು ಪರ್ಸಿವರೆನ್ಸ್ ರೋವರ್ ಮುಖಾಂತರ ಯಾವುದೇ ಅಡೆತಡೆ ಇಲ್ಲದೇ ಮಂಗಳನಲ್ಲಿ ಸುರಕ್ಷಿತವಾಗಿ ತಲುಪಿಸುವುದರಲ್ಲಿ ಈ ವಿಜ್ಞಾನಿಗಳು ಯಶಸ್ವಿಯಾದರು.

ಮಂಗಳ ಗ್ರಹದಲ್ಲಿ ಹಾರಿದ ಇಂಜುನಿಟಿ ಹೆಲಿಕಾಪ್ಟರ್

ಪರ್ಸಿವರೆನ್ಸ್ ತನ್ನ ಹೊಟ್ಟೆಯಲ್ಲಿದ್ದ ಇಂಜುನಿಟಿ ಹೆಲಿಕಾಪ್ಟರ್ ಅನ್ನು ಏಪ್ರಿಲ್ 03, 2021 ರಂದು ಮಂಗಳನ ಅಂಗಳನ ಮೇಲೆ ಇಳಿಬಿಟ್ಟಿತು.  ಇದಾದ ನಂತರ ಇಂಜುನಿಟಿಯ ಸವಾಲು ಮಂಗಳನ ಹವಾಮಾನ ಎದುರಿಸುವುದು.  ರಾತ್ರಿಯ ಸಮಯದಲ್ಲಿ -90 ಡಿಗ್ರಿ ಸೆಲ್ಸಿಯಸ್ ವರೆಗೂ ತಾಪಮಾನ ಇಳಿಯುವುದರಿಂದ, ಇಂಜುನಿಟಿಯ ಉಪಕರಣಗಳು ಹಾಳಾಗದಂತೆ ಡಿಸೈನ್ ಮಾಡುವುದು ಸವಾಲಿನ ಕೆಲಸ. ನಾಸಾದ JPL ವಿಜ್ಞಾನಿಗಳು ಇಂಜುನಿಟಿಯನ್ನು ಈ ಎಲ್ಲಾ ಸಾವಲನ್ನು ಮೆಟ್ಟಿ ನಿಲ್ಲುವಂತೆ ಡಿಸೈನ್ ಮಾಡಿದ್ದರು. ತದನಂತರ ಇಂಜುನಿಟಿ ಹೆಲಿಕಾಪ್ಟರ್ ಗೆ ಏಪ್ರಿಲ್ 19 ರಂದು ಸ್ವಯಂಚಾಲಿತವಾಗಿ ನಿರ್ದಿಷ್ಟ ಎತ್ತರಕ್ಕೆ ಹಾರಿ ನಂತರ ಸುರಕ್ಷಿತವಾಗಿ ಲ್ಯಾಂಡ್ ಆಗುವಂತೆ ಸಿದ್ದಪಡಿಸಿದ್ದ ಕೋಡೆಡ್ ಮಾಹಿತಿಯನ್ನು ಡೀಪ್ ಸ್ಪೆಸ್ ನೆಟ್ ವರ್ಕ್ ಅಂಟೆನಾ ಸಹಾಯದಿಂದ ವಿಜ್ಞಾನಿಗಳು ಕಳುಹಿಸಿದ್ದರು. ಈ ಘಟನೆಯನ್ನು ಅಲ್ಲೆ ದೂರದಲ್ಲಿದ್ದ ಪರ್ಸಿವರೆನ್ಸ್ ರೊವರ್ ತನ್ನ ಕ್ಯಾಮರಾದಿಂದ ವೀಕ್ಷಣೆ ಮಾಡುವ ವ್ಯವಸ್ಥೆ ರೂಪಿಸಲಾಗಿತ್ತು. ಈ ಎಲ್ಲಾ ಘಟನೆಗಳೂ ಸ್ವಯಂಚಾಲಿತವಾಗಿ ನಡೆದು, ಘಟನೆಯ ಪ್ರತಿಯೊಂದು ಡೆಟಾಗಳು, ವಿಡಿಯೋಗಳು ರೆಕಾರ್ಡ್ ಆಗಿ ಭೂಮಿಗೆ ಬರಲು ಸುಮಾರು ನಾಲ್ಕು ಗಂಟೆಯ ಸಮಯ ತೆಗೆದುಕೊಂಡಿತು.  ಇಂಜುನಿಟಿಯಿಂದ ಯಾವ ಡೇಟಾ ಬರಬಹುದು, ಪಲಿತಾಂಶ ಏನಿರಬಹುದೂ ಎಂದು ವಿಜ್ಞಾನಿಗಳು ಕಾದು ಕುಳಿತರು.

ಅದೇ ದಿನ ಭಾರತೀಯ ಕಾಲಮಾನದ ಸಮಯ ಸಂಜೆ ನಾಲ್ಕ ಗಂಟೆಯ ಸುಮಾರಿಗೆ ಇಂಜುನಿಟಿಯಿಂದ ಡೇಟಾ ಅದೇ ಡೀಪ್ ಸ್ಪೆಸ್ ನೆಟ್ ವರ್ಕ್ ಅಂಟೆನಾಯಿಂದ ಭೂಮಿಗೆ ಬಂದಿತು.  ಪರ್ಸಿವರೆನ್ಸ್ ರೋವರ್ ಇಂಜುನಿಟಿಯು ಮಂಗಳನ ಮೇಲ್ಮೈನಿಂದ 3 ಮೀಟರ್ ಹಾರಿ, ಸ್ವಲ್ಪ ಹೊತ್ತು ಗಾಳಿಯಲ್ಲಿದ್ದು ನಂತರ ನೆಲಕ್ಕೆ ಸುರಕ್ಷಿತವಾಗಿ ಲ್ಯಾಂಡ್ ಆಗಿರುವುದನ್ನು ತಾನು ತೆಗಿದಿದ್ದ ವಿಡಿಯೋ ಮುಖಾಂತರ ಧೃಡೀಕರಿಸಿತು. JPL ಕೊಠಡಿಯಲ್ಲಿ ಉಸಿರು ಬಿಗಿ ಹಿಡಿದು ಕಾಯುತ್ತಿದ್ದ ವಿಜ್ಞಾನಿಗಳಿಗೆ ಒಮ್ಮೆಲೆ ಉತ್ಸಹಾ, ಸಂತೋಷದ ಕಟ್ಟೆ ಒಡೆಯಿತು.  ಮಾನವನ ಇತಹಾಸದಲ್ಲಿಯೇ ಅನ್ಯಗ್ರಹದಲ್ಲಿ ನಿಯಂತ್ರಿತ ವೈಮಾನಿಕ ಹಾರಾಟ ನಡೆಸಿರುವುದು ಇದೆ ಮೊದಲನೆಯದು. 

Ingeunity Helicopter on Mars [Credit: NASA/JPL]

ಸಧ್ಯಕ್ಕೆ ಈ ಹಾರಾಟ ಚಿಕ್ಕದಾದರೂ ಮುಂದಿನ ವರ್ಷದಲ್ಲಿ ಇತರ ಗ್ರಹಗಳ ಮೇಲೂ ಹಾರಲು ಯೋಗ್ಯವಾದ ಹೆಲಿಕಾಪ್ಟರ್ ಮತ್ತು ವಿಮಾನಗಳನ್ನು ತಯಾರಿಸುವುದಕ್ಕೆ ಇಟ್ಟ ಮೊದಲ ಚಾರಿತ್ರಿಕ ಹೆಜ್ಜೆಗೆ ನಾವೆಲ್ಲರೂ ಸಾಕ್ಷಿಯಾಗಿರುವುದಂತು ಸತ್ಯ.  ಮುಂದಿನ ಒಂದು ತಿಂಗಳಿನಲ್ಲಿ ಇಂಜುನಿಟಿ ಇಂತಹಾ ಐದು ವೈಮಾನಿಕ ಹಾರಾಟಾ ನಡೆಸಲು ಅನುವಾಗುವಂತೆ ಸಿದ್ದಪಡಿಸಲಾಗಿದೆ.  ಇದು ಮಂಗಳ ಗ್ರಹದ ತೆಳುವಾದ ವಾತವರಣದ ಬಗ್ಗೆ ಮತ್ತಷ್ಟು ಹೆಚ್ಚು ಮಾಹಿತಿಯನ್ನು ನಮಗೆ ನೀಡಲಿದೆ.  ಇಂಜುನಿಟಿ (Ingeunity) ಎಂದರೆ ಕೆಲಸಗಳನ್ನು ಕೌಶಲ್ಯದಿಂದ ಹೊಸರೀತಿಯಲ್ಲಿ ಮಾಡುವುದು. ಹಾಗೆಯೇ ಮಂಗಳನಲ್ಲಿರುವ ಇಂಜುನಿಟಿ, ನಮ್ಮಲ್ಲಿ ಹೊಸ ಯೋಚನೆಗಳನ್ನು, ಹೊಸ ಪ್ರಶ್ನೆಗಳನ್ನು, ಹೊಸ ವಿಚಾರಗಳನ್ನು ಕಲಿಯಲು ಪ್ರೇರೇಪಿಸುತ್ತಿದ್ದು, ಮುಂದಿನ ದಿನಗಳಲ್ಲಿ ಮನುಷ್ಯನು ಮಂಗಳ ಗ್ರಹಕ್ಕೆ ತೆರಳುವ ಕನಸುಗಳನ್ನು ನನಸು ಮಾಡಲು ಮೊದಲ ಅಂಬೆಗಾಲಿಟ್ಟಿರುವುದಂತೂ ನಿಜ.

James Webb Telescope

~ neelamouna ~ Leave a comment

1609 ವೆನ್ನಿಸ್ ಅಲ್ಲಿ ನಡೆದ ಎಕ್ಸ್ಪೋಸಿಶನ್ ನಲ್ಲಿ ಒಂದು ಆಪ್ಟಿಕಲ್ ಟ್ಯೂಬ್ ಅನ್ನು ಪ್ರದರ್ಶನಕ್ಕೆ ಇಡಲಾಗಿತ್ತು. ಈ ಆಪ್ಟಿಕಲ್ ಟ್ಯೂಬ್ ಅಂದರೆ, ಈಗಿನ ಬೈನಾಕ್ಯುಲರ್ ನ ಒಂದು ಭಾಗ.  ಈಗ ಇಂತಹಾ ಆಪ್ಟಿಕಲ್ ಟ್ಯೂಬ್ ಅನ್ನು ಮೋನಾಕ್ಯುಲರ್ ಎಂದು ಕರೆಯುತ್ತಾರೆ. ಆಪ್ಟಿಕಲ್ ಟ್ಯೂಬ್ ನ ಪ್ರದರ್ಶನದ ವಿಷಯ ಅಂದಿನ ಒಬ್ಬ ಗಣಿತಜ್ಞನ ಗಮನಕ್ಕೆ ಬಂದಾಗ, ಅದನ್ನು ನೋಡಲು ವೆನ್ನಿಸ್ ಎಕ್ಸ್ಪೋಸಿಶನ್ ಗೆ ಹೊಗಲೇ ಬೇಕು ಎಂದುಕೊಂಡರು.   ಎಕ್ಸ್ಪೋಸಿಶನ್ ನಲ್ಲಿದ್ದ ಆಪ್ಟಿಕಲ್ ಟ್ಯೂಬ್ ಅನ್ನು ವಿನ್ಯಾಸ ಮಾಡಿದ್ದು ಕನ್ನಡಕ ತಯಾರಕ. ಅವನ ಹೆಸರು ಹ್ಯಾನ್ಸ್ ಲಿಪರ್ಶೆ. ಇತನೇ ಈ ಆಪ್ಟಿಕಲ್ ಟ್ಯೂಬ್ ನ ಸಂಶೋಧಕ ಎಂದೂ ಕರೆಯಲಾಗಿದೆ. ಆ ಎಕ್ಸ್ಪೋಸಿಶನ್ ನಲ್ಲಿ ದೂರದಲ್ಲಿ ಕಾಣುವ ವಸ್ತುವನ್ನು ಎರಡು ಲೆನ್ಸ್ ಗಳಿರುವ ಆಪ್ಟಿಕಲ್ ಟ್ಯೂಬ್ ನ ಸಹಾಯದಿಂದ ಹತ್ತಿರದಲ್ಲಿರುವಂತೆ ನೋಡಬಹುದು ಎಂದು ವಾದಿಸುತ್ತಿದ್ದ ಮತ್ತು ಎಲ್ಲರಿಗೂ ತೊರಿಸುತ್ತಿದ್ದ.  ಇದನ್ನು ನೋಡಲು ಹೊದ ಗಣಿತಜ್ಞನ ಹೆಸರು ಗೆಲಿಲಿಯೋ ಗೆಲಿಲಿ!

ಮೊದಲ ಬಾರಿಗೆ ಗೆಲಿಲಿಯೋ ಈ ಆಪ್ಟಿಕಲ್ ಟ್ಯೂಬ್ ಅನ್ನು ಕಂಡಾಗ ಇದನ್ನು ಇನ್ನಷ್ಟು ಸುಧಾರಿಸಿ ವಿನ್ಯಾಸ ಮಾಡಿದರೆ ವಸ್ತುಗಳು ಸ್ಪಷ್ಟವಾಗಿ ಕಾಣಬಹುದು ಎಂದು ತಿಳಿದು, ತನ್ನ ಯೋಚನೆಯ ಅನುಸಾರ ಹೊಸದಾಗಿ ಈ ಆಪ್ಟಿಕಲ್ ಟ್ಯೂಬ್ ಅನ್ನು ವಿನ್ಯಾಸ ಮಾಡಿದನು. ತದನಂತರ ಇದು ಸ್ಪೈ ಗ್ಲಾಸ್ (Spy Glass- ಪತ್ತೇದಾರಿ ಕನ್ನಡಕ) ಎಂದೇ ಪರಿಚಯವಾಯಿತು. ಇದನ್ನು ಸಮುದ್ರದಲ್ಲಿ ದೂರದಲ್ಲಿ ಬರುವ ಮತ್ತು ಹೊಗುವ ಹಡಗುಗಳನ್ನು ನೋಡಲು ಉಪಯೋಗಿಸಲಾಗುತ್ತಿತ್ತು. ಗೆಲಿಲಿಯೋ ಕೂಡ ಈ ಸ್ಪೈ ಗ್ಲಾಸ್ ಅನ್ನು ಅಂದಿನ ವೆನ್ನಿಸ್ ನಗರದ ಮ್ಯಾಜಿಸ್ಟ್ರೇಟರ್ ಗೆ ನೀಡಿದ್ದ. ಈ ಸ್ಪೈ ಗ್ಲಾಸ್ ಜನಪ್ರಿಯವಾದಂತೆ ಗೆಲಿಲಿಯೋನ ಜನಪ್ರಿಯತೆಯೂ ಹೆಚ್ಚಿತು.  ತದನಂತರ, ಗೆಲಿಲಿಯೋ ಈ ಸ್ಪೈ ಗ್ಲಾಸ್ ಮೇಲೆ ಅನೇಕ ವಿಧದ ಪ್ರಯೋಗಗಳನ್ನು ನಡೆಸಿ, ಇತರೆ ಕೆಲಸಗಳಿಗೂ ಉಪಯೋಗವಾಗಬಹುದಾ ಎಂಬುದನ್ನು ಯೋಚಿಸುತ್ತಿದ್ದ. ಹೀಗೆ ಯೋಚಿಸಿ, ಅನೇಕ ಪ್ರಯೋಗಗಳನ್ನು ನೆಡೆಸಿ ತನ್ನ ಸ್ಪೈ ಗ್ಲಾಸ್ ಅನ್ನು ಇನ್ನಷ್ಟು ಸುಧಾರಿಸಿ, ಆಕಾಶದ ಕಡೆಗೆ ತಿರುಗಿಸಿದ!

ಮನುಷ್ಯನ ಇತಿಹಾಸದಲ್ಲಿಯೇ ಪ್ರಥಮ ಬಾರಿಗೆ ಚಂದ್ರನನ್ನು ಗೆಲಿಲಿಯೋ ತಾನೇ ಮಾಡಿದ ಸ್ಪೈ ಗ್ಲಾಸ್ (ದೂರದರ್ಶಕ)ನಿಂದ ಹತ್ತಿರದಲ್ಲಿ ಕಂಡಿದ್ದ.  ಚಂದ್ರನ ಮೇಲೆ ಕುಳಿ (Crater) ಗಳಿರುವುದನ್ನು, ಬೆಟ್ಟ ಗುಡ್ಡಗಳಿರುವುದನ್ನು ಮೊದಲ ಬಾರಿಗೆ ಕಂಡದ್ದು ಗೆಲಿಲಿಯೋ. ಇದಾದ ನಂತರ ಅಂದಿಗೆ ತಿಳಿದಿದ್ದ ಆಕಾಶದಲ್ಲಿ ಚುಕ್ಕಿಗಳಂತೆ ಹೊಳೆಯುತ್ತಿದ್ದ ಆಕಾಶದ ಅಲೆಮಾರಿಗಳಾದ ಗ್ರಹಗಳ ಕಡೆಗೆ ತನ್ನ ಸ್ಪೈ ಗ್ಲಾಸ್ ಅನ್ನು ತಿರುಗಿಸಿದ. ಇದು ಗೆಲಿಲಿಯೋನಾ ಕಲ್ಪನೆಗೂ ನಿಲಕದ ಕ್ಷಣವಾಗಿತ್ತು!

ಅಲ್ಲಿಯವರೆಗೂ ಆಗಸದಲ್ಲಿ ಚುಕ್ಕಿಯಾಗಿ ಒಂದು ನಕ್ಷತ್ರ ಪುಂಜದಿಂದ ಮತ್ತೊಂದು ನಕ್ಷತ್ರ ಪುಂಜಕ್ಕೆ ಚಲಿಸುತ್ತಿದ್ದ ಗ್ರಹಗಳನ್ನು ಮೊದಲ ಬಾರಿಗೆ ಡಿಸ್ಕ್ ರೂಪದಲ್ಲಿ (ಗ್ರಹಗಳ ಅಸ್ಪಷ್ಟವಾದ ವಿವರಗಳು) ಕಂಡಿದ್ದ ಗೆಲಿಲಿಯೋ. ನಂತರ ನಕ್ಷತ್ರಗಳಿಗೆ ಸ್ಪೈ ಗ್ಲಾಸ್ ಅನ್ನು ತಿರುಗಿಸಿದಾಗ, ಅವುಗಳು ಚುಕ್ಕಿಯಾಗಿಯೇ ಕಂಡವು. ಇದನ್ನು ಗಮನಿಸಿದ ಗೆಲಿಲಿಯೋ ನಕ್ಷತ್ರಗಳು ಗ್ರಹಗಳಿಗಿಂತಲೂ ಅತೀ ಹೆಚ್ಚು ದೂರದಲ್ಲಿವೆ ಎಂಬುದನ್ನು ಗ್ರಹಿಸಿದ.  ಗುರು ಗ್ರಹವನ್ನು ತನ್ನ ಸ್ಪೈ ಗ್ಲಾಸ್ ಅಲ್ಲಿ ಕಂಡಾಗ.  ಅದರ ಸುತ್ತ ನಾಲ್ಕು ಚುಕ್ಕಿಗಳು, ಚಂದ್ರ ಹೇಗೆ ಭೂಮಿಯ ಸುತ್ತ ಸುತ್ತುತ್ತಿದ್ದಾನೆ ಹಾಗೆ ಅವುಗಳು ಗುರು ಗ್ರಹದ ಸುತ್ತ ಸುತ್ತುತ್ತಿವೆ ಎಂಬುದನ್ನು ಗ್ರಹಿಸಿದ.  ಇದು ಅಂದಿನ ಸಾಂಪ್ರದಾಯಿಕವಾದಿಗಳು ಮತ್ತು ಮೂಲಭೂತವಾದಿಗಳಿಗೆ ಹಿಡಿಸಲಿಲ್ಲ. ಅವರು ಭೂಮಿ, ಭೂಮಿ ಸುತ್ತ ಚಂದ್ರ ಸುತ್ತುವುದು; ಹಿಗೆ ಇರುವ ಏಕಮಾತ್ರ ವ್ಯವಸ್ಥೆಯನ್ನು ದೇವರು ಸೃಷ್ಟಿಸಿದ್ದಾನೆ ಎಂಬ ನಂಬಿಕೆಗಳ ವಿರುದ್ಧವಾಗಿದ್ದವು. ಆದರೆ, ಈ ನಂಬಿಕೆಗಳನ್ನೆಲ್ಲವನ್ನು ಹೊಡೆದು ಹಾಕಿದ್ದು, ಗೆಲಿಲಿಯೋನ ಆಕಾಶ ವೀಕ್ಷಣೆ. ಗುರು ಗ್ರಹದ ಉಪಗ್ರಹಗಳನ್ನು ಇಂದಿಗೂ ಗೆಲಿಲಿಯೋ ಮೂನ್ಸ್ (ಗೆಲಿಲಿಯೋ ಉಪಗ್ರಹಗಳು) ಎಂದು ಕರೆಯುತ್ತಾರೆ.  ಗೆಲಿಲಿಯೋ ವಿನ್ಯಾಸ ಮಾಡಿದ ಸ್ಪೈ ಗ್ಲಾಸ್ ಅನ್ನು ಗೆಲಿಲಿಯೋ ದೂರದರ್ಶಕ ಎಂದು ಕರೆಯಲಾಗಿದೆ.  ಈ ದೂರದರ್ಶಕ ಮನುಷ್ಯನು ನಿರ್ಮಿಸಿಕೊಂಡಿರುವ ಒಂದು ಅಪರೂಪದ ಕಣ್ಣು. ಇದು ಸಾಂಪ್ರದಾಯಿಕತೆ ಮತ್ತು ಮೂಲಭೂತವಾದಿಗಳ ಜೊಳ್ಳುಗಟ್ಟಿದ ಚಿಂತನೆಗಳನ್ನು ಒಡೆದು ಹಾಕಿ ವಿಶ್ವದ (ಪ್ರಕೃತಿಯ) ವಾಸ್ತವತೆ, ವಿಶಾಲತೆ ಮತ್ತು ನಿಗೂಢತೆಯನ್ನು ನಮ್ಮ ಕಣ್ಣೆದುರಿಗಿರಿಸಿತು. 1609 ರ ಹಿಂದಿನ ಮನುಷ್ಯನಿಗಿದ್ದ ಖಗೋಳದ ಅರಿವು, ದೂರದರ್ಶಕ ಬಂದ ನಂತರದ ಮನುಷ್ಯನಿಗಿರುವ ಖಗೋಳದ ತಿಳಿವು ಹೊಲಿಸಲಾಸಾಧ್ಯ.  ನಭೋ ಮಂಡಲದ ವಿಸ್ಮಯವನ್ನು ಭೇಧಿಸುವಲ್ಲಿ, ವಿಶ್ವದ ಉಗಮ, ಪ್ರಸ್ತುತತೆ, ಅಂತ್ಯ ಎಂಬ ಪ್ರಶ್ನೆಗಳಿಗೆ ಉತ್ತರ ಹುಡುಕುವ ದಾರಿಯಲ್ಲಿ ದೂರದರ್ಶಕವು ಒಂದು ಕ್ರಾಂತಿಕಾರಿಕ ಬದಲಾವಣೆಯನ್ನೇ ಮಾಡಿದೆ.  ದೂರದರ್ಶಕವನ್ನು ಮೊದಲ ಬಾರಿಗೆ ವಿನ್ಯಾಸ ಮಾಡಿ ಆಕಾಶಕ್ಕೆ ತಿರುಗಿಸಿದ್ದು, ಇಂದಿಗೆ ಸುಮಾರು 412 ವರ್ಷಗಳಾಗಿವೆ!

Don’t Know Much About ಸರಣಿಯ ಪುಸ್ತಕಗಳ ಲೇಖಕ ಮತ್ತು ಇತಿಹಾಸಕಾರರಾದ ಕೆನ್ನಿತ್ ಸಿ ಡೆವಿಸ್ ತನ್ನ ಪುಸ್ತಕದಲ್ಲಿ ಹೀಗೆ ಹೇಳುತ್ತಾನೆ. “Necessity is the mother of invention ಎಂಬ ಇಂಗ್ಲೀಷ್ ನಾಣ್ಣುಡಿಯನ್ನು ಕೇಳಿರಬೇಕು. ಗೆಲಿಲಿಯೋ ಕಾಲದಲ್ಲೂ, ಅಲ್ಲಿಂದೂ ಇಗಲೂ ಹಲವು ಹೊಸ ಅವಿಷ್ಕಾರಗಳು, ತಂತ್ರಜ್ಞಾನಗಳು ತೀವ್ರಗತಿಯಲ್ಲಿ ನಡೆದಿರುವ ಕಾಲಘಟ್ಟಗಳನ್ನು ಅವಲೋಕಿಸಿದರೆ, ಅವೆಲ್ಲವೂ ನಡೆದಿರುವುದು ಯುದ್ಧದ ಸಮಯದಲ್ಲಿಯೇ ಅಥವಾ ಯುದ್ಧಕ್ಕೋಸ್ಕರವೇ.  “May be war is the inventor’s father” ಎಂದು ಬಣ್ಣಿಸುತ್ತಾನೆ”.  ಹಾಗೆಯೇ ಅತೀ ಹೆಚ್ಚು ಸಂಶೋಧನೆಗಳು ನಡೆದಿರುವುದು ಯುದ್ಧದ ಸಮಯದಲ್ಲಿ ಅಥವಾ ಯುದ್ಧ ಮಾಡುವುದಕ್ಕಾಗಿಯೇ.  ಎರಡನೇ ಮಾಹಾ ಯುದ್ಧ ಅಂತ್ಯಗೊಂಡ ನಂತರ, 1960ರ ದಶಕದಲ್ಲಿ ಪ್ರಾರಂಭವಾಗಿದ್ದು ಸ್ಪೇಸ್ ರೇಸ್ (Space Race) ಎಂಬ ಶೀತಲ ಸಮರ.  ಅಮೇರಿಕಾದವರು ಹಿಟ್ಲರ್ ಸಾಮ್ರಾಜ್ಯದಲ್ಲಿ ರಾಕೆಟ್ ಇಂಜಿನಿಯರ್ ಆಗಿದ್ದ ವಾರ್ನರ್ ವಾನ್ ಬ್ರೌನ್ ಅನ್ನು ಸಾಯಿಸದೇ ಹಿಡಿದುಕೊಂಡು ಹೊಗುತ್ತಾರೆ. ಈತ ವಿನ್ಯಾಸ ಮಾಡಿದ V2 ರಾಕೆಟ್ ಎರಡನೇ ಮಾಹಾ ಯುದ್ಧದಲ್ಲಿ ಲಂಡನ್ ಅನ್ನು ಧ್ವಂಸ ಮಾಡಿತ್ತು. ಈ ರಾಕೆಟ್ ಇಂಜಿನಿಯರ್ ಅಮೇರಿಕನ್ ಆದ ನಂತರ, ನಾಸಾ ಸೇರಿದ ಮೇಲೆ, 1969ರಲ್ಲಿ V2 ರಾಕೆಟ್ ಅನುಭವದಿಂದಲೇ ತಯಾರಿಸಿದ Saturn V ರಾಕೆಟ್ ನಲ್ಲಿ ಹೊರಟ ಅಪೋಲೋ 11 ಗಗನಯಾತ್ರಿಗಳು ಚಂದ್ರನ ಮೇಲೆ ಮೊದಲ ಬಾರಿಗೆ ಕಾಲಿಟ್ಟರು. ನೀಲ್ ಆರ್ಮ್ ಸ್ಟ್ರಾಂಗ್ ಚಂದ್ರನ ಮೇಲೆ ಮೊದಲು ಇಳಿದದ್ದು, ನಂತರ ಬಸ್ ಆಲ್ಡ್ರಿನ್ ಇಳಿಯುತ್ತಾರೆ. ಮೈಕ್ ಕಾಲಿನ್ಸ್ ಗಗನ ನೌಕೆಯಲ್ಲಿ ಚಂದ್ರನನ್ನು ಸುತ್ತುತ್ತಿರುತ್ತಾರೆ.  ಭೂಮಿಯನ್ನು ಬಿಟ್ಟು ಸೌರ ಮಂಡಲದ ಇನ್ನೊಂದು ಆಕಾಶ ಕಾಯದಲ್ಲಿ ಕಾಲಿಟ್ಟ ಮೊದಲ ಮಾನವನ ಹೆಜ್ಜೆಗಳು ಅಪೋಲೋ 11 ಗಗನ ಯಾತ್ರಿಗಳದ್ದಾಗಿತ್ತು! ಇದು ಸಾಧ್ಯವಾದದ್ದು V2 ರಾಕೆಟ್ ನಿಂದ ಎರವಲಾಗಿ ಪಡೆದಿದ್ದ ತಂತ್ರಜ್ಞಾನದಿಂದ.  ಅಂದಿನ ಸಂವಹನ ಮಾಧ್ಯದಲ್ಲಿ ಲೈವ್ ಆಗಿ ಪ್ರಪಂಚದಾದ್ಯಂತ ಜನರು ನೋಡಿದ, ಕೇಳಿದ ಘಟನೆ ಇದಾಗಿತ್ತು. ಅಪೋಲೋ ಯೋಜನೆಯು ಕೂಡ ಅಮೇರಿಕಾ ಮತ್ತು ರಷ್ಯಾದ ಸ್ಪೇಸ್ ರೇಸ್ ಶೀತಲ ಸಮರದ ಒಂದು ಭಾಗವಾಗಿತ್ತು. ಅದೇನೆ ಇರಲಿ, 1903 ರಲ್ಲಿ ರೈಟ್ ಬ್ರದರ್ಸ್ ಪ್ರಥಮವಾಗಿ ವೈಮಾನಿಕ ಸಂಚಾರವನ್ನು ನಡೆಸುವಲ್ಲಿ ಸಫಲವಾಗುತ್ತಾರೆ. ಇದಾದ 56 ವರ್ಷಗಳಲ್ಲಿ ಚಂದ್ರನ ಮೇಲೆ ಮಾನವ ನಡೆಯು ಚಾರಿತ್ರಿಕ ಸಂಧರ್ಬ 1969ರ ಅಪೋಲೋ ಆಗಿತ್ತು.

ಖಗೋಳ ವಿಜ್ಞಾನದ ಕೂತೂಹಲ ಹೆಚ್ಚಾದಂತೆ, ಅನೇಕ ಉಪಗ್ರಹಗಳು, ಗಗನನೌಕೆಗಳು, ಬಾಹ್ಯಾಕಾಶ ನಿಲ್ದಾಣಗಳು ಭೂಮಿಯ ಕಕ್ಷೆಗೆ ಹಾರತೊಡಗಿದವು. ಖಗೋಳದ ಕೌತುಕಗಳನ್ನು ಕಂಡು ಹಿಡಿಯಲು ಬೇಕಾಗುವ ಥಿಯರಿಗಳು, ಚರ್ಚೆಗಳು ಮತ್ತು ಸಾಧನಗಳು ಸಹ ಅಭಿವೃದ್ಧಿಗೊಂಡವು.  ವಿಶ್ವದ ನಿಗೂಢತೆ, ವಿಶ್ವದ ಉಗಮವನ್ನು ಭೇದಿಸಲೇ ಬೇಕು ಎನ್ನುವ ಮಾನವನ ಚಲವು ಹೆಚ್ಚುತ್ತಾ ಹೊದಂತೆ, ಅದರ ಸವಾಲುಗಳು ಹೆಚ್ಚ ತೊಡಗಿದವು.  ನಾಲ್ಕುನೂರು ವರ್ಷಗಳ ಹಿಂದೆ ಗೆಲಿಲಿಯೋ ವಿನ್ಯಾಸ ಗೊಳಿಸಿದ್ದ ದೂರದರ್ಶಕಕ್ಕಿಂತಲೂ 300, 400 ಪಟ್ಟು ಹೆಚ್ಚು ಸಾಮರ್ಥ್ಯವಿರುವ ದೂರದರ್ಶಕದ ವೀಕ್ಷಣಾಲಯಗಳನ್ನು ಭೂಮಿಯ ಮೇಲೆ ನಿರ್ಮಿಸಿ ಆಕಾಶದ ಒಂದಿಂಚು ಬಿಡದೆ ವೀಕ್ಷಣೆ ಮತ್ತು ಅಧ್ಯಯನವನ್ನು ಮನುಷ್ಯನು ಇಂದಿಗೆ ಕೈಗೊಳ್ಳುತ್ತಿರುವುದು ವಿಶೇಷ.

ಆದರೆ, ಈ ಭೂ ವೀಕ್ಷಣಾಲಯದಲ್ಲಿಯೂ ಒಂದು ಸಮಸ್ಯೆ ಇದೆ.  ಭೂಮಿಯ ವಾತವರಣವೇ ಒಂದು ದೊಡ್ಡ ಸಮಸ್ಯೆ.  ಬಿಲಿಯನ್ ಜೋತಿ ವರ್ಷಗಳ ದೂರದಲ್ಲಿರುವ ಗ್ಯಾಲಾಕ್ಸಿ, ನೆಬುಲ್ಲಾಗಳ ಮಸುಕಾದ ಬೆಳಕು ಭೂಮಿಯ ವಾತವರಣವನ್ನು ಪ್ರವೇಶಿಸಿ ಬರಬೇಕು. ಭೂ ವಾತವರಣದಲ್ಲಿನ ಹಲವು ಅನಿಲಗಳು, ಕಣಗಳು ಈ ಬೆಳಕಿನ ಜೊತೆ ಸಂವಹನಗೊಳ್ಳುತ್ತವೆ. ಈ ಬೆಳಕನ್ನು ಭೂಮಿಯ ವಿಕ್ಷಣಾಲಯಗಳು ಅಧ್ಯಯನ ಮಾಡುವಾಗ ಆಕಾಶ ಕಾಯಗಳ ಹಲವು ಮಾಹಿತಿಗಳು ನಾಶವಾಗುತ್ತದೆ ಅಥವಾ ಅಸ್ಟಷ್ಟವಾಗುತ್ತವೆ. ಹಾಗಾಗಿ ಭೂ ವೀಕ್ಷಣಾಲಯಗಳಿಗೆ ಕೆಲವೊಂದು ಮಿತಿ ಇದೆ.  ಇದನ್ನು ಸರಿ ಪಡಿಸುವುದು ಹೇಗೆ ಎಂದರೆ, ವೀಕ್ಷಣಾಲಯಗಳನ್ನು ಭೂಮಿಯಿಂದ ಹೊರಗೆ ಅಂದರೆ, ಭೂ ವಾತವರಣದಿಂದ ಹೊರಗೆ ನಿರ್ಮಿಸುವುದರಿಂದ ಮಾತ್ರ! 

ವಿಜ್ಞಾನ ಮತ್ತು ತಂತ್ರಜ್ಞಾನ ಮುಂದುವರಿದಂತೆ, ವೀಕ್ಷಣಾಲಯಗಳನ್ನು ಉಪಗ್ರಹಗಳ ಮಾದರಿಯಲ್ಲಿ ರಾಕೆಟ್ ಮೂಲಕ ಹಾರಿಸಿ ಭೂ ಕಕ್ಷೆಯಲ್ಲಿ ಸುತ್ತುವಂತೆ ಮಾಡುವುದು ಕಷ್ಟವೇನಾಗಲಿಲ್ಲಾ.  ಈಗೆ ಹಾರಿದ ಅನೇಕ ದೂರದರ್ಶಕಗಳಲ್ಲಿ ಅತ್ಯಂತ ಜನಪ್ರಿಯವಾದದ್ದು ಹಬಲ್ ದೂರದರ್ಶಕ.  ನಾಸಾ ಸಂಸ್ಥೆಯು ವಿನ್ಯಾಸ ಮಾಡಿದ ಹಬಲ್ ದೂರದರ್ಶಕ 1990 ರಲ್ಲಿ ನಭಕ್ಕೆ ಚಿಮ್ಮಿತು. ಇದು ಭೂಮಿಯಿಂದ ಸುಮಾರು 500 ಕಿಲೋಮೀಟರ್ ದೂರದ ಕಕ್ಷೆಯಲ್ಲಿ ಭೂಮಿಯನ್ನು ಸುತ್ತುತ್ತಿದೆ.  ಈ ದೂರದರ್ಶಕದಲ್ಲಿ ಸುಮಾರು 2.4 ಮೀಟರ್ ಅಳತೆಯುಳ್ಳ ದರ್ಪಣ ಇದೆ.  ಭೂಮಿಯಲ್ಲಿ 10 ಮೀಟರ್ ದರ್ಪಣ ಇರುವ ವೀಕ್ಷಣಾಲಯಗಳಿದ್ದರೂ, ಹಬಲ್ ದೂರದರ್ಶಕದ 2.4 ಮೀಟರ್ ದರ್ಪಣ ಅತ್ಯಂತ ಶಕ್ತಿಯುತ.  ಏಕೆಂದರೆ, ಹಬಲ್ ದೂರದರ್ಶಕಕ್ಕೆ ಭೂಮಿಯ ವಾತವರಣದ ಸಮಸ್ಯೆ ಕಾಡುವುದಿಲ್ಲ. ಈ ಕಾರಣದಿಂದ ಹಬಲ್ ನಭೋ ಮಂಡಲವನ್ನು ಅತ್ಯಂತ ನಿಖರವಾಗಿ, ಸೂಕ್ಷ್ಮವಾಗಿ ಗಮನಿಸಿ, ನಮಗೆ ಮಾಹಿತಿಯನ್ನು ನೀಡುವಲ್ಲಿ ಸಫಲವಾಯಿತು. ಈ ದೂರದರ್ಶಕದ ಸಹಾಯದಿಂದ ಸೌರ ಮಂಡಲದ ಗ್ರಹಗಳು, ಗ್ಯಾಲಾಕ್ಸಿಗಳು, ಸೂಪರ್ನೊವಾ ಮತ್ತು ನೆಬುಲ್ಲಾಗಳ ಬಗ್ಗೆ ಮನುಷ್ಯನಿಗೆ ಇದ್ದ ಅರಿವು ಇನ್ನಷ್ಟು ವಿಸ್ತಾರವಾಯಿತು. ಒಂದು ಕಾಲದಲ್ಲಿ ಗ್ರಹದ ಪಟ್ಟಿಯಲ್ಲಿದ್ದ ಪ್ಲೂಟೋ (ಈಗ ಕುಬ್ಜ ಗ್ರಹದ ಪಟ್ಟಿಯಲ್ಲಿದೆ) ಚಿತ್ರವನ್ನು ಪ್ರಥಮ ಬಾರಿಗೆ ನಮಗೆ ಹಬಲ್ ತೊರಿಸಿತು. ಹಬಲ್ ಅನ್ನು ನಭೋ ಮಂಡಲಕ್ಕೆ ಕಳುಹಿಸಿದಾಗ ಅದರ ಆಯಸ್ಸು ಸುಮಾರು 15 ವರ್ಷಗಳು ಎಂದು ಅಂದಾಜಿಸಲಾಗಿತ್ತು.  ಆದರೆ, 30 ವರ್ಷಗಳಾದರೂ ಇಂದಿಗೂ ಚಾಲ್ತಿಯಲ್ಲಿದೆ.  ಈಗೀಗ ಹಬಲ್ ನ ಹಾರ್ಡ್ ವೇರ್ ನಲ್ಲಿ ಸಮಸ್ಯೆ ಕಾಣಿಸಿಕೊಳ್ಳುತ್ತಿದ್ದು, ಇನ್ನೂ ಎಷ್ಟು ತಿಂಗಳು/ವರ್ಷ ಉಪಯೋಗಿಸಬಹುದು ಎಂಬುದನ್ನು ಲೆಕ್ಕ ಹಾಕಲಾಗುತ್ತಿದೆ.  ಆದರೂ, ಹಬಲ್ ದೂರದರ್ಶಕ ಮನಷ್ಯನ ಕಣ್ಣನ್ನು ಹೆಚ್ಚು ತೀಕ್ಷ್ಣಮಾಡಿ, ವಿಶ್ವದ ಭೂತಕಾಲದ ಇತಿಹಾಸವನ್ನು ನೋಡಲು ಸಹಾಯ ಮಾಡಿತು.

ಈ ವರ್ಷದ ಕ್ರಿಸ್ ಮಸ್ (25ನೇ ಡಿಸೆಂಬರ್) ದಿನದಂದು ದಕ್ಷಿಣ ಅಮೇರಿಕಾದ ಫ್ರೆಂಚ್ ಗಯಾನಾದ, ಗಯಾನ ಸ್ಟೇಸ್ ಸೆಂಟರ್ ನಿಂದ ಏರಿಯನ್ 5 ರಾಕೆಟ್ ನಲ್ಲಿ ಉಡಾವಣೆಗೊಳ್ಳಲಿದೆ ಪ್ರಪಂಚದ ಅತ್ಯಂತ ದೊಡ್ಡದಾದ ಅಂತರಿಕ್ಷ ದೂರದರ್ಶಕ. ಇದರ ಹೆಸರು ಜೆಮ್ಸ್ ವೆಬ್ ದೂರದರ್ಶಕ (James Webb Telescope) ನಾಸಾ ಸಂಸ್ಥೆಯ ದಶಕಗಳ ಕಾಲದ ಮಹಾತ್ವಾಕಾಂಶೆ ಯೋಜನೆ ಇದಾಗಿದೆ. ಇದು, ಅಮೇರಿಕಾ, ಯೂರೋಪ್ ಮತ್ತು ಕೆನಡಾ ದೇಶದ ಸಹಭಾಗಿತ್ವದಲ್ಲಿ ನಡೆಯುತ್ತಿರುವ ಒಂದು ಅಂತರಾಷ್ಟ್ರೀಯ ಯೋಜನೆ. 

ಹಬಲ್ ದೂರದರ್ಶಕದ ದರ್ಪಣಕ್ಕಿಂತಲೂ ಸುಮಾರು 6 ಪಟ್ಟು ಹೆಚ್ಚು ಬೆಳಕನ್ನು ಸಂಗ್ರಹಿಸುವ ಸಾಮರ್ಥ್ಯವನ್ನು ಜೆಮ್ಸ್ ವೆಬ್ ಟೆಲಿಸ್ಕೋಪ್ ಹೊಂದಿದೆ.  ಈ ದೂರದರ್ಶಕವು ಅಂತರಿಕ್ಷದಲ್ಲಿ ಸಂಪೂರ್ಣವಾಗಿ ತೆರೆದುಕೊಂಡರೆ ಸುಮಾರು ಒಂದು ಟೆನ್ನಿಸ್ ಅಂಗಳದ ಅಳತೆಯಷ್ಟಿರುತ್ತದೆ.  ಭೂಮಿಯಿಂದ ಇದು ಚಲಿಸುವ ದೂರ ಮತ್ತು ತಲುಪುವ ಸ್ಥಳವೂ ವಿಶೇಷವಾದದ್ದು. ಇದನ್ನು ಭೂಮಿಯಿಂದ ಸುಮಾರು 1.5 ಮಿಲಿಯನ್ ಕಿಲೋಮಿಟರ್ ದೂರದ ಕಕ್ಷೆಗೆ ಕಳುಹಿಸಲಾಗುತ್ತಿದೆ (ಚಂದ್ರ ಭೂಮಿಯಿಂದ 3 ಲಕ್ಷ ಕಿಲೋಮೀಟರ್ ಇದೆ. ಹಬಲ್ ದೂರದರ್ಶಕ ಸುಮಾರು 500 ಕಿಲೋ ಮೀಟರ್ ದೂರದಲ್ಲಿದೆ).  ಭೌತ ವಿಜ್ಞಾನದ ಪ್ರಕಾರ, ಸೂರ್ಯ, ಭೂಮಿ ಮತ್ತು ಚಂದ್ರನ ಗುರುತ್ವ ಬಲದ ಸಂವಹನದಲ್ಲಿ ಉಂಟಾಗಿರುವ ಲೆಗ್ರಾಂಜಿಯನ್ L2 ‍ಬಿಂದುವಿನಲ್ಲಿ ಈ ದೂರದರ್ಶಕವನ್ನು ಇಡಲಾಗುತ್ತಿದೆ. ಈ ಬಿಂದುವಿನ ವಿಶೇಷವೆಂದರೆ,  ಸೂರ್ಯ, ಭೂಮಿ ಮತ್ತು ಚಂದ್ರನ ಗುರುತ್ವ ಬಲದಿಂದಲೇ ಈ ಬಿಂದುವಿನಲ್ಲಿರುವ ವಸ್ತುವು ಸೂರ್ಯನ ಸುತ್ತ ಸುತ್ತುತ್ತದೆ. ಇದೇ ಕಕ್ಷೆಯಲ್ಲಿ ಯಾವುದೇ ವಸ್ತುವನ್ನು/ ಉಪಗ್ರಹವನ್ನು ಉಳಿಸಿಕೊಳ್ಳಲು ಅತ್ಯಂತ ಕಡಿಮೆ ಇಂದನದ ಅಗತ್ಯತೆ ಇರುತ್ತದೆ. ಅಲ್ಲದೆ, ಯಾವಾಗಲು ಭೂಮಿಯ ನೆರಳಲ್ಲೇ ಇರುವುದರಿಂದ, ಸೂರ್ಯನ ಬೆಳಕು ಈ ದೂರದರ್ಶಕಕ್ಕೆ ಬೀಳುವುದು ಕಡಿಮೆ. ಈ ಎಲ್ಲಾ ಕಾರಣಗಳಿಂದ, ಕಳೆದ ಒಂದು ದಶಕದಿಂದಲೂ 14 ದೇಶದ ವಿಜ್ಞಾನಿಗಳು, ಇಂಜಿನಿಯರ್ಗಳು, ವಿನ್ಯಾಸಕಾರರು ಅತ್ಯಂತ ಸಂಕೀರ್ಣವಾದ ಇಂಜಿನಿಯರಿಂಗ್ ಮತ್ತು ಅತ್ಯಾಧುನಿಕ ತಂತ್ರಜ್ಞಾನದ ಆಧಾರದ ಮೇಲೆ ನಿರ್ಮಿಸಿರುವ ಈ ಜೆಮ್ಸ್ ವೆಬ್ ದೂರದರ್ಶಕದ ಉಡಾವಣೆ 1969ರ ಅಪೋಲೋ 11 ರ ಉಡಾವಣೆಯ ಸಂದರ್ಭದಂತೆ ಎಂದು ಹಲವು ಖಗೋಳ ವಿಜ್ಞಾನಿಗಳು, ವಿಜ್ಞಾನ ಇತಿಹಾಸಕಾರರು ಅಭಿಪ್ರಾಯ ಪಟ್ಟಿದ್ದಾರೆ.

ಈ ದೂರದರ್ಶಕ ಅವೆಗೆಂಪು (Infrared Radiation) ಕಿರಣಗಳಲ್ಲಿ ಕೆಲಸ ಮಾಡುತ್ತದೆ. ಈ ದೂರದರ್ಶಕದ ಪ್ರಮುಖ ಉದ್ದೇಶ 13.5 ಬಿಲಿಯನ್ ವರ್ಷಗಳ ಹಿಂದೆ ನಡೆದ ಬಿಗ್ ಬ್ಯಾಂಗ್ (ಮಹಾ ಸ್ಟೋಟೋದ)ನ ಯವ್ವನದ ಸ್ಥಿತಿಯನ್ನು ನೋಡುವುದು. ಬಿಗ್ ಬ್ಯಾಂಗ್ ಆದ ನಂತರ ಪ್ರಥಮ ಗ್ಯಾಲಾಕ್ಸಿಗಳು ಹೇಗೆ ಉಗಮವಾದವೂ ಎಂಬ ವಿಷಯವನ್ನು ತಿಳಿಯುವುದು. ಅರೆ ಅಷ್ಟು ವರ್ಷಗಳ ಹಿಂದೆ ನಡೆದ ಘಟನೆಯ ಬಗ್ಗೆ ಈಗ ಹೇಗೆ ತಿಳಿಯುವುದು ಎಂದು ಯೋಚಿಸುತ್ತಿರುವಿರಾ? ನಭೋ ಮಂಡಲದ ವಿಸ್ಮಯವೇ ಹಾಗಿದೆ. ನಾವು ವಿಶ್ವದಲ್ಲಿ ಅತ್ಯಂತ ದೂರದಲ್ಲಿರುವ ಗ್ಯಾಲಾಕ್ಸಿ, ನೆಬುಲ್ಲಾಗಳನ್ನು ನೋಡುತ್ತಿದ್ದರೆ, ನಾವು ಆ ಗ್ಯಾಲಾಕ್ಸಿಗಳು ಎಷ್ಟು ಜೋತಿ ವರ್ಷ ದೂರದಲ್ಲಿವೆಯೋ ಅಷ್ಟು ವರ್ಷದ ಹಿಂದಿನ ಸ್ಥಿತಿಯನ್ನು ಈಗ ನೋಡುತ್ತಿರುತ್ತೇವೆ.  ಉದಾಹರಣೆಗೆ, ಒಂದು ಗ್ಯಾಲಾಕ್ಸಿಯು 10 ಲಕ್ಷ ಜೋತಿ ವರ್ಷ ದೂರದಲ್ಲಿದೆ ಅಂದುಕೊಳ್ಳೋಣ. ಆ ಗ್ಯಾಲಕ್ಸಿಯನ್ನು ದೂರದರ್ಶಕದ ಮುಖಾಂತರ ಈಗ ನೋಡಿದಾಗ ನಮಗೆ ತಿಳಿಯುವ ಮಾಹಿತಿಯು ಆ ಗ್ಯಾಲಕ್ಸಿಯ 10 ಲಕ್ಷ ವರ್ಷದ ಹಿಂದೆ ಹೇಗಿದೆ ಎಂದು. ಇದು ಭೂಮಿಗೂ ಅನ್ವಯವಾಗುತ್ತದೆ.  ಅಂದರೆ, ನಮ್ಮಿಂದ ಮಿಲಿಯನ್ ಜೊತಿ ವರ್ಷ ದೂರವಿರುವ ಗ್ಯಾಲಾಕ್ಸಿಯಿಂದ ಯಾರಾದರೂ ಭೂಮಿಯ ಕಡೆಗೆ ಈಗ ನಮ್ಮನ್ನು ದೂರದರ್ಶಕದಿಂದಲೋ ಅಥವಾ ಇನ್ಯೋವುದೋ ತಂತ್ರಜ್ಞಾನದಿಂದಲೋ ನೋಡುತ್ತಿದ್ದರೆ, ಅವರಿಗೆ ಭೂಮಿಯ ಮೇಲೆ ಮನಷ್ಯರ ಬದಲು, ಭೂಮಿಯ ಡೈನೋಸಾರಾಸ್ ಗಳು ಮಾತ್ರ ಕಾಣುತ್ತಿರುತ್ತವೆ. ಇನ್ನೂ ದೂರದಿಂದ ನೋಡಿದವರಿಗಿ, ಭೂಮಿಯ ಪ್ರಾರಂಭದ ಸ್ಥಿತಿಯುನ್ನು ಮಾತ್ರ ಗ್ರಹಿಸುತ್ತಾರೆ. ಹಾಗಾಗಿ, ನಭೋ ಮಂಡಲದಲ್ಲಿ ಹೆಚ್ಚು ದೂರದಲ್ಲಿರುವ ಆಕಾಶ ಕಾಯವನ್ನು ವೀಕ್ಷಣೆ ಮಾಡಿದಾಗ, ಅಷ್ಠೆ ಹಿಂದಕ್ಕೆ ಅಂದರೆ ಭೂತಕಾಲಕ್ಕೆ ತೆರಳುತ್ತಿರುತ್ತೇವೆ. ಈ ಕಾರಣದಿಂದ ಜೆಮ್ಸ್ ವೆಬ್ ಅಂತರಿಕ್ಷ ದೂರದರ್ಶಕ ಬಿಗ್ ಬ್ಯಾಂಗ್ ನಂತರದ ಮೊದಲ ಗ್ಯಾಲಾಕ್ಸಿಯನ್ನು ಪತ್ತೆ ಹಚ್ಚಬಹುದಾದ ಸಾಮರ್ಥ್ಯವಿದೆ ಎಂದು ಲೆಕ್ಕ ಹಾಕಲಾಗಿದೆ. ಇದಲ್ಲದೆ ಇನ್ನಿತರ ಹಲವು ಖಗೋಳಿಯ ಅನ್ವೇಷಣೆಗಳನ್ನು ಈ ದೂರದರ್ಶಕದಲ್ಲಿನ ಉಪಕರಣಗಳ ಸಹಾಯದಿಂದ ಕೈಗೊಳ್ಳಬಹುದು.  

ಈ ದೂರದರ್ಶಕದಲ್ಲಿ ಇದೂವರೆಗೂ ಯಾವ ದೂರದರ್ಶಕದಲ್ಲಿರದ ಅತ್ಯಾಧುನಿಕ ಉಪಕರಣಗಳಾದ Near-Infrared Camera, Near-Infrared Spectrograph, Mid-Infrared Instruments ಮತ್ತು Near-Infrared Slitless Spectrograph ಗಳನ್ನು ಇತರೆ ವೈಜ್ಞಾನಿಕ ಅಧ್ಯಯನಕ್ಕೆ ಅಳವಡಿಸಲಾಗಿದೆ.   ಇದೊಂತರಾ Future-ready ದೂರದರ್ಶಕ.  ಅಂದರೆ, ಮುಂದೆ ಜನಸಾಮಾನ್ಯರಿಗೆ ದೊರಕಬಹುದಾದ ತಂತ್ರಜ್ಞಾನವೆಲ್ಲವನ್ನು ಈ ದೂರದರ್ಶಕದಲ್ಲಿ ಆಗಲೇ ಜೋಡಿಸಲಾಗಿದೆ. ಇದೆಲ್ಲದರ ಜೊತೆಗೆ, ಭೂಮಿಯಿಂದ 1.5 ಮಿಲಿಯನ್ ಕಿಲೋ ಮಿಟರ್ ದೂರದಲ್ಲಿರುವ ಲೆಂಗ್ರಾಂಜಿಯನ್ L2 ಬಿಂದುವಿನ ಕಡೆಗೆ ಚಲಿಸುವ ಇದರ ಪ್ರಯಾಣ ಅತ್ಯಂತ ಕಠಿಣವಾದದ್ದು.  ರಾಕೆಟ್ ನಲ್ಲಿ ಮಡಿಚಿದ ರೂಪದಲ್ಲಿರುವ ಈ ದೂರದರ್ಶಕ, ನಭೋ ಮಂಡಲದಲ್ಲಿ ಒಂದೊಂದಾಗಿ ಬಿಡಿಸಿಕೊಳ್ಳುತ್ತಾ ಅಷ್ಟು ದೂರ ಕ್ರಮಿಸಬೇಕು.  ಈ ಬಿಡಿಸಿಕೊಳ್ಳುವ ಸಮಯದಲ್ಲಿ ಸಣ್ಣದೊಂದು ಪ್ರಮಾದವಾದರೂ ಈ ದೂರದರ್ಶಕ ಅನುಪಯುಕ್ತವಾಗಬಹುದು.  ಕಳೆದ ಒಂದು ದಶಕದಿಂದ ವಿಜ್ಞಾನಿಗಳು, ಇಂಜಿನಿಯರ್ ಗಳು, ವಿನ್ಯಾಸಕಾರರು ಈ ಸಮಸ್ಯೆಗಳನ್ನೆಲ್ಲ ಗ್ರಹಿಸಿ ಅಷ್ಟೆ ಜಾಗೃತವಾಗಿ, ಹಲಾವಾರು ಪರೀಕ್ಷೆಗೊಳಪಡಿಸಿ, ಪ್ರಯೋಗಗಳನ್ನು ನಡೆಸಿ, ಎಲ್ಲವೂ ಸರಿ ಇದೆ ಎಂದು ಸ್ಪಷ್ಟವಾಗಿ ತಿಳಿದ ಮೇಲೆ ರಾಕೆಟ್ ಒಳಗೆ ಇದನ್ನು ಕೂರಿಸಿದ್ದಾರೆ. ಒಮ್ಮೆ ರಾಕೆಟ್ ಹೊರಟರೆ, ಮುಂದಿನ ಎಲ್ಲಾ ಪ್ರಕ್ರಿಯೆಯನ್ನು ಕಂಪ್ಯೂಟರ್ ಪರದೆಯ ಮೂಲಕವೇ ನಿಯಂತ್ರಿಸಬೇಕು!  

ಏನೇ ಇರಲಿ, ಜೆಮ್ಸ್ ವೆಬ್ ದೂರದರ್ಶಕವನ್ನು ಮನುಷ್ಯನ ಚಿನ್ನದ ಕಣ್ಣು (Golden Eye) ಎಂದೇ ಬಿಂಬಿಸಲಾಗುತ್ತಿದೆ.  ದೂರದರ್ಶಕದ ದರ್ಪಣದ ಮೇಲ್ಮೈಯನ್ನು ಚಿನ್ನದಿಂದ ಲೇಪನ ಮಾಡಲಾಗಿದೆ. ಚಿನ್ನವೇ ಏಕೆಂದರೆ, ಚಿನ್ನ ಬೆಳಕನ್ನು (ಅವೆಗೆಂಪು ಕಿರಣಗಳನ್ನು) ಅತಿ ಹೆಚ್ಚು ಪ್ರತಿಫಲಿಸುತ್ತದೆ.  ಈ ಕಾರಣದಿಂದಲೂ ಈ ದೂರದರ್ಶಕ ಚಿನ್ನದ ಕಣ್ಣು ಮತ್ತು ಈ ದೂರದರ್ಶಕ ಮುಂದಿನ ದಿನಗಳಲ್ಲಿ ವಿಶ್ವದ ಬಗ್ಗೆ ನಮಗೆ ನೀಡುವ ಅರಿವು ಚಿನ್ನದಷ್ಠೆ ಮೌಲ್ಯವಾದದ್ದು ಎಂದು ತಿಳಿಯಲಾಗಿದೆ.  ಅಂದಹಾಗೆ ಜೆಮ್ಸ್ ವೆಬ್ ದೂರದರ್ಶಕ ಯಶಸ್ವಿಯಾಗಿ ಉಡಾವಣೆಯಾದ ಮೇಲೆ ಸುಮಾರು ಆರು ತಿಂಗಳು ಬೇಕು ತನ್ನ ವೈಜ್ಞಾನಿಕ ಕಾರ್ಯ ಚಟುವಟಿಕೆಗಳನ್ನು ಪ್ರಾರಂಭಿಸಲು.  ತದನಂತರ ಈ ದೂರದರ್ಶಕದ ಕಾಲಾವಧಿ ಐದು ವರ್ಷಗಳಿದ್ದು, 10 ವರ್ಷಗಳ ವರೆಗೂ ವಿಸ್ತರಿಸಬಹುದಾಗಿದೆ.  ಜೆಮ್ಸ್ ವೆಬ್ ದೂರದರ್ಶಕದ ಮೊದಲ ಬೆಳಕಿನ ಚುಂಬನ ಹೇಗಿರುತ್ತದೆ ಎಂದು ವಿಜ್ಞಾನಿಗಳು ಕಾತುರದಿಂದ ಕಾಯುತ್ತಿದ್ದಾರೆ. ಗೆಲಿಲಿಯೋನ ಸ್ಪೈ ಗ್ಲಾಸ್ ಇಂದ ಬಹಳ ದೂರ ಬಂದಿರುವ ಮನುಷ್ಯನಿಗೆ, ಬಿಲಿಯನ್ ವರ್ಷಗಳ ಹಿಂದೆ ವಿಶ್ವವು ಹೆಗಿತ್ತು ಎನ್ನುವ ಕೂತೂಹಲ ಮಾತ್ರ ಇನ್ನೂ ಬತ್ತಿಲ್ಲಾ.

ಬಾಹ್ಯಾಕಾಶ ವಿಷಯ ಬಂದಾಗ, ಬಾಹ್ಯಾಕಾಶದ ವಿಸ್ಮಯ, ಕೌತಕಗಳ ಬದಲು ಇತ್ತೀಚೆಗೆ ಬಹಳ ಚರ್ಚೆಯಲ್ಲಿರುವುದು ಆಗರ್ಭ ಶ್ರೀಮಂತರ ಹೆಸರುಗಳು ಮತ್ತು ಅವರ ಕಂಪನಿಗಳು. ಕಳೆದ ಎರಡು ದಶಕಗಳಲ್ಲಿ ಬಾಹ್ಯಾಕಾಶಕ್ಕೆ ಸರ್ಕಾರೇತರ ಖಾಸಗಿ ಸಂಸ್ಥೆಗಳು ಪ್ರವೇಶ ಪಡೆದಿರುವುದು ಹೊಸ ವಿಷಯವೆನಲ್ಲಾ. ಹೇಗೆ ಭೂಮಿಯು ಇಡೀ ಜಿವಸಂಕುಲಕ್ಕೆ ಸೇರಿದ್ದೋ ಹಾಗೇಯೇ ಬಾಹ್ಯಾಕಾಶವು ಎಲ್ಲಾ ದೇಶಗಳಿಗೂ, ಎಲ್ಲಾ ನಾಗರಿಕರಿಗೂ ಸೇರಿದ್ದು. ಒಂದು ದೇಶದವರು ಅಥವಾ ಸರ್ಕಾರವು ಬಾಹ್ಯಾಕಾಶ ತನಗೆ ಸಂಬಂಧಿಸಿದ್ದು ಎಂದು ಹಕ್ಕು ಸ್ಥಾಪಿಸುವ ಪ್ರಶ್ನೆ ಇರುವುದಿಲ್ಲ ಮತ್ತು ಮಾಡುವುದಕ್ಕೆ ಅವಕಾಶವು ಇರುವುದಿಲ್ಲ. ಆದರೆ, ಬಾಹ್ಯಾಕಾಶ ಸಂಶೋಧನೆ, ಅಂತರಿಕ್ಷಯಾನ ಕೈಗೊಳ್ಳಲು ದೇಶಗಳಿಗೆ ಆರ್ಥಿಕ ಶಕ್ತಿ ಇರಬೇಕು ಅಥವ ಇತರ ಶಕ್ತಿ ದೇಶಗಳು ಸಹಾಯ ಮಾಡಬೇಕು. ಶಕ್ತಿಯುತ ದೇಶಗಳಲ್ಲಿನ ಖಾಸಗಿ ಸಂಸ್ಥೆಗಳಿಗೂ ಬಾಹ್ಯಾಕಾಶ ಯಾನ ಮತ್ತು ಅದರ ಲಾಭಧಾಯಕ ಕೆಲಸಗಳಿಗೆ ಸರ್ಕಾರಗಳು ಅನುಮತಿ ನೀಡುತ್ತಿವೆ. ಅವರು ತಮ್ಮದೆ ಹಾದಿಯಲ್ಲಿ ನಡೆಯುತ್ತಿದ್ದಾರೆ. ಆದರೆ, ಚರ್ಚೆ ಹುಟ್ಟುಹಾಕಿರುವುದು, ಕಳೆದ ಒಂದು ದಶಕದಲ್ಲಿ ಖಾಸಗಿ ಬಾಹ್ಯಾಕಾಶ ಸಂಸ್ಥೆಗಳಿಂದ ನಡೆಯುತ್ತಿರುವ ಕ್ಷಿಪ್ರಗತಿಯ ಅತ್ಯಾಧುನಿಕ ತಾಂತ್ರಿಕತೆ, ರಾಕೆಟ್ ಅಥವಾ ಸ್ಪೇಸ್ ವೆಹಿಕಲ್ ಗಳ ಉಗಮ ಮತ್ತು ಅದರ ಮೂಲಕ ಪ್ರಪಂಚಕ್ಕೆ ಅವರು ಪ್ರಸ್ತುತಿ ಪಡಿಸುತ್ತಿರುವ ಪ್ರಯೋಗಗಳು. ಇಂದಿಗೆ ಜಗತ್ತಿನ ಧೈತ್ಯ ಶ್ರೀಮಂತರೆಲ್ಲಾ ಒಂದೊಂದು ಬಾಹ್ಯಾಕಾಶ ಸಂಸ್ಥೆಗಳನ್ನು ಹುಟ್ಟುಹಾಕಿದ್ದಾರೆ. ಅವರೆಲ್ಲೂರು ಬಾಹ್ಯಾಕಾಶ ಸಂಶೋಧನೆ ಮತ್ತು ಅಭಿವೃದ್ಧಿಯಲ್ಲಿ ಅತ್ಯಂತ ಹೆಚ್ಚು ಹಣವನ್ನು ಹೂಡಿಕೆ ಮಾಡಿ, ರಾಕೆಟ್ ಗಳನ್ನು ಸೃಷ್ಠಿಸಿ, ತಮ್ಮ ಮೂಗಿನ ನೇರಕ್ಕೆ ಅಗತ್ಯವಿರುವದನ್ನು ಯೋಚಿಸಿ ಅದೇ ಸರಿಯೆಂದು ತಿಳಿದು, ಹೆಚ್ಚು ಲಾಭ ಗಳಿಸುವ ದೃಷ್ಠಿಯಿಂದ ಶ್ರಿಮಂತರಿಗೆ ಬಾಹ್ಯಾಕಾಶವನ್ನು ಕೈಗೆಟುಕವಂತೆ ಮಾಡಿ, ಮನುಕುಲಕ್ಕೆ ಉಪಕಾರವಾಗುತ್ತಿದೆ ಎಂದು ಬೀಗುತ್ತಿದ್ದಾರೆ ಎನ್ನುವ ಚರ್ಚೆ ಒಂದಿದ್ದರೆ, ಈ ಖಾಸಗಿ ಬಾಹ್ಯಾಕಾಶ ಸಂಸ್ಥೆಗಳು ಮುನ್ನೆಲೆಗೆ ಬಂದ ನಂತರ, ಇವರಿಂದ ಅತೀ ಕಡಿಮೆ ವೆಚ್ಚದಲ್ಲಿ ದೇಶಗಳಿಗೆ ಅಗತ್ಯವಿರುವ ಬಾಹ್ಯಾಕಾಶ ಸೇವೆಗಳು ಮತ್ತು ಸೌಲಭ್ಯಗಳು ಎಲ್ಲರಿಗೂ ಸಿಗುವಂತೆ ಆಗಿದೆ ಎಂದು ಹೇಳುವ ಇನ್ನೊಂದು ಚರ್ಚೆಯೂ ಕೇಳಿ ಬರುತ್ತಿದೆ. ನಮ್ಮಲ್ಲಿ ಹಣವಿದೆ, ತಂತ್ರಜ್ಞಾನವಿದೆ, ಅನುಮತಿ ಇದೆ ಎಂದ ಮಾತ್ರಕ್ಕೆ ತಾವು ಏನೇ ಮಾಡಿದರು ಅದು ಸಾಮಾಜಿಕವಾಗಿ ಸರಿಯಾಗಿಯೇ ಇರುತ್ತದೆ ಎನ್ನವು ಹಟ ಈ ಆಗರ್ಭ ಶ್ರಿಮಂತರಿಗಿದೆ. ಮನುಷ್ಯನು ತಾನು ಇರುವ ಗ್ರಹವನ್ನು ಬಿಟ್ಟು, ಇನ್ನೊಂದು ಗ್ರಹದಲ್ಲಿ ವಾಸಿಸಬೇಕು. ಅಲ್ಲಿರುವ ಸಂಪನ್ಮೂಲಗಳನ್ನು ಮನುಷ್ಯನ ಉಪಯೋಗಕ್ಕೆ ಬಳಸಿಕೊಳ್ಳಬೇಕು ಎಂಬ ಅಚಲ ನಿರ್ಧಾರವನ್ನು ಇವರುಗಳಾಗಲೇ ಮಾಡಿದ್ದರೆ. ಒಬ್ಬರು ಚಂದ್ರ ನನ್ನದು ಎಂದರೆ, ಮತ್ತೊಬ್ಬರು ಮಂಗಳ ಗ್ರಹ ನನ್ನದು ಎನ್ನುವಂತಾಗಿದೆ. ಟಿಕೆಟ್ ಕೂಡ ಆಗಲೇ ಸೇಲ್ ಮಾಡಿದ್ದಾರೆ. ಇದಕ್ಕೆಲ್ಲಾ ಈ ಶಕ್ತಿಯುತ ದೇಶಗಳ ಸರ್ಕಾರದ ಬೆಂಬಲಗಳೂ ಇರುವುದು ರಹಸ್ಯ ವಿಷಯವೇನಲ್ಲಾ. ಏನೆ ಇರಲಿ, ಮಾನವನ ಪ್ರಗತಿಯ ದಾರಿಗೆ ಸರಿಯಾದ ಅಧ್ಯಯನಗಳಿಲ್ಲದೆ, ಅಗತ್ಯಗಳಿಲ್ಲದೆ ತಮ್ಮ ಬಳಿ ಏನು ಬೇಕಾದರೂ ಮಾಡಲು ಹಣವಿದೆ ಎಂದು ಮನಸೋಇಚ್ಛೇ ತನ್ನ ಸಂಸ್ಥೆಯ ಲಾಭಕ್ಕಾಗಿ ಸಾಧಿಸಲೇಬೇಕೆಂದು ಮಾಡುವ ಕೆಲಸಗಳು (ಇತ್ತೀಚೆಗೆ ಸ್ಪೆಸ್ ಗೆ ಹೊಗಿ ಬಂದ ಶ್ರೀಮಂತರುನ್ನು ನೆನಪಿಸಿಕೊಳ್ಳಬಹುದು, ಆಕಾಶದಲ್ಲಿ ಸಾಲುಗಳಾಗಿ ಉಪಗ್ರಹಗಳು ಚಲಿಸುವುದನ್ನು ಕಂಡಿರಬಹುದು) ಮತ್ತು ಶ್ರೀಮಂತರು ಏನು ಮಾಡಿದರು ಅದನ್ನು ಕಿಂಚಿತ್ತು ಅವಲೋಕಿಸದೆ ವಿಜ್ರುಂಬಿಸಿ ತೊರಿಸುವ ಮೆದುಳಿಲ್ಲದ ಮಾಧ್ಯಮಗಳು ಬಾಹ್ಯಾಕಾಶದ ವಿಸ್ಮಯವನ್ನು ಅರಿಯುವ ಮಾನವನ ಚಿಂತನೆಗಳನ್ನು, ಕಲ್ಪನೆಗಳನ್ನು ಹೊಸಕಿ ಹಾಕುತ್ತಿರುವುದಂತೂ ಸತ್ಯ ಎನ್ನಿಸುವಂತಾಗಿದೆ. ಮುಂದೊಂದು ದಿನ, ಬಾಹ್ಯಾಕಾಶ ಎಂದರೆ, ಶ್ರೀಮಂತರು, ಅವರ ಕಂಪನಿಗಳು, ಅವರ ರಾಕೆಟ್ ಗಳು ಅವರ ಲಾಭ-ನಷ್ಟ ಮಾತ್ರ ಹೇಳುವ ಕಾಲ ಬಹಳ ದೂರದಲ್ಲಿಲ್ಲಾ. ಹಾಗೆ ಹೇಳಿದಾಗಲೂ ಅದನ್ನೂ ಸಮರ್ಥಿಸಿಕೊಳ್ಳುವ ನಾಗರೀಕತೆಯನ್ನು (ಮಾಧ್ಯಮ) ಆ ಶ್ರೀಮಂತರೇ ಬೆಳೆಸಿರುತ್ತಾರೆ. ಇದರ ಬಗ್ಗೆ ಈಗಿನಿಂದಲೇ ಎಚ್ಚರ ವಹಿಸುವುದು ಅತ್ಯವಶ್ಯಕ.